Column: Verweande sikke!

Column: Verweande sikke!

Zo heanig an zitte viej met z’n aln al een dik joar in de Corona crisis. Det zat nen dikn streep duur oonze vriejheaid, viej wördn wier met de beaide bene op de groond e-zat. De vlagge oet vuur alle leu in de gezondheidszorg. Petje of !
Viej dachen met n aln ongeheenderd vuurwaarts te könn goan, gin meanske moch oons wat in de weg legn. Vuur een poar stuwer een tripje noar Milaan, skiën in de deurste strekke van Fraankrieke of kiten in Madagaskar. Alns mut, alns mag, geeld te ballast, leve de welvaart.

A’j een joar wieter kiekt deungt de hele gezondheidszorg vuur ginne meter, roetn duur, GGD testruumtes in de fik, weenkels pleundern umdet Rutte ne oawndklokke insteelt. De leu zeent hellig, de leu zeent de weg kwiet.

Ik leuze in het RD ne fantastische visie van Professor Paul Wells oawer de christelijke hoppe mildn in dissen coronatied. Wells is hoogleraar an de Faculté Jean Calvin in Aix-en-Provence. Wells zeg doar da’w nit wieter köant kiekn as een volgenden boch. De pandemie störtn oons in ‘n soort wanhoop, het normale leawn is vuurbiej, en vuur völle leu blif der dan löagte en zinloosheaid oawer. Weetnschap, gezoondheaidszorg, vaccins kriengt, zo at Wells zeg, een soort messiaanse rolle, mear ofgoden hebt nog nooit eure belofte woar-emaakt. Hee wis op de riekdommen van het christelijke geleuwe det de geleuwigen nooit oetzichloos zeent, ook al maakt ze van alns met.

Tegenoawer dee bange leu dee at allenig mear vertrouwt op de weetnschap, op het moondkäpke, op de spuite der in en moatregelen van de oawerheaid, kan nen christen vertrouwen op zinnen God. God kan hoppe schepn teegn alle wanhoppe in duur in te griepn in de natuurlijke routine um wat niejs te schepn. As christen mu’j gewoon gepaste ofstaand nemn van de coronagebuurtenissen, nit te dichte biej, nit te wied der of.

Ik deanke det Wells geliek hef. De leu zeent driete-verweand, het zeent aln deksel verweande sikke. Alns mut maakboar wean, gin teegnslag, de oawerheaid mut oons niks in de weg legn en zelfs koarken goat nit helemoals vriej oet.

Netuurlijk mu’w corona nit oetvlakn en is de coronacrisis verschrikkelijk, mear wat meender is det oe de kraantn en de tellevisie een heeln dag streujt met grafiekn, interviews, persconfereanties, wiér 200 meender besmettingn en 2 meender op de IC en alwier vertroaging van de Pfizer of Mordernaspuiten.

Loa’w astebleef wier gewoon goan doon, zelf een volkstuintje anhaaln, nit te wied vot op vakaantie, gezoond etn, op tied mangs ne pekkelhearing, nit te völle dreenkn, op uur en tied loopn of fietsen en nit te late noar berre hen.

Gerard Voortman

Meer berichten